Өнөөдөр дэлхийн оюуны өмчийн өдөр тохиож байна
Дэлхийн оюуны өмчийн байгууллага (WIPO)-аас зохиогчийн эрх, барааны тэмдэг, бүтээгдэхүүний загвар бидний өдөр тутмын амьдралд хэрхэн нөлөөлдгийг, бүтээн туурвигчдыг дэмжих зорилгоор энэ өдрийг тодорхой уриа дор тэмдэглэж ирсэн бөгөөд энэ жил “ОЮУНЫ ӨМЧ БА ТОГТВОРТОЙ ХӨГЖЛИЙН ЗОРИЛТ: ШИНЭ САНАА, БҮТЭЭЛЧЭЭР ИРЭЭДҮЙГЭЭ БҮТЭЭЦГЭЭЕ” уриа дор тэмдэглэж байна.
Оюуны өмч гэж юу вэ?
Оюуны өмчид шинэ бүтээл, утга зохиолын болон уран сайхны бүтээл, худалдаанд хэрэглэдэг тэмдэг, нэр, дүрс зэрэг оюуны бүтээлүүд хамаардаг. Оюуны өмчийг хоёр хэсэг болгож ангилдаг.
Үүнд:
Аж үйлдвэрийн өмч - Шинэ бүтээлийн патент, барааны тэмдэг, бүтээгдэхүүний загвар, газар зүйн заалт.
Зохиогчийн эрх - Роман, тууж, шүлэг яруу найраг, жүжгийн зохиол гэх мэт утга зохиолын бүтээлүүд; кино, хөгжмийн бүтээл болон зураг, уран зураг, гэрэл зураг гэх мэт уран сайхны бүтээл, мөн түүнчлэн уран баримал, архитектурын бүтээлүүд багтдаг. Цаашилбал зохиогчийн эрхэд жүжигчдийн уран бүтээл, дуу авиа үйлдвэрлэгчдийн болон радио, телевизийн нэвтрүүлгийн эрх тус тус хамаарна.
Оюуны өмч нь өөрөө нуугдмал шинжтэй учраас иргэд оюуны өмчид халдах, түүнийг хулгайлах асуудал их гардаг. - Манай улсад хамгийн түгээмэл гардаг оюуны өмчийн хулгайд урлагийн бүтээлүүд болох дууны ая, шүлэг, зохиол ордог байна.
Оюуны өмч, зохиогчийн эрхийг дээдэлцгээе.