Талийгаач И Сун Кюны нээлтээ хийгээгүй уран бүтээлүүд цацагдах уу?
Хар тамхи хэрэглэсэн байж болзошгүй хэргээр цагдаад шалгагдаж байсан жүжигчин И Сун Кюн машин дотроо нас барсан байдалтайгаар олдсон харамсалтай хэрэг өнгөрөгч арван хоёрдугаар сард гарсан. 48 настай тэрээр урлагийн замналынхаа ид оргил үед байсан бөгөөд Оскарын шагналт “Parasite” кинонд бүтээсэн дүрээрээ 2021 онд салбарын нэр хүндтэй шагнал “Screen Actors Guild”-ийг хүртэж байв.
Одоогоор И Сун Кюны амьд ахуйдаа тоглосон нээлтээ хийгээгүй хоёр бүтээл байгаа бөгөөд цацагдах эсэх нь тун эргэлзээтэй байна. Олон нийтийн зүгээс уг хоёр киног энэ зун нээлтээ хийнэ гэж таамаглаж байгаа ч киног хариуцсан компаниуд албан ёсны мэдээлэл хийгээгүй байна. Уг кинонууд цаг хугацаа хөвөрхийн хэрээр хуучирч байгаад компаниудын зүгээс санаа зовж байгаа ч хэл амнаас болгоомжилж цацахгүй байгаа бололтой. Түүний нээлтээ хийгээгүй хоёр бүтээл нь "Project Silence" болон "Heaven: To the Land of Happiness" юм.
"Heaven: To the Land of Happiness" киноны зураг авалт дууссаны дараа тэрээр "Олон талаараа сорьсон гайхалтай төсөл байлаа. Би үзэгчдэдээ удаан хугацаанд хоногших чанартай бүтээл үзүүлэхийг хүсэж байна. Иймдээ ч энэхүү уран бүтээлд сэтгэл хангалуун байгаа" хэмээн ярьжээ. Түүний хүсэл энэ жил биелэх эсэхийг хүлээж л байя даа.