1 мин

Обамагийн гэр бүл "Spotify" платформ дээр подкаст хийхээр боллоо

Б.Саруул 2019.06.07 5

1498

АНУ-ын Ерөнхийлөгч асан Барак Обама эхнэр Мишель Обамагийн хамт "Spotify" платформ дээр подкаст хийхээр болсон тухай BBC агентлаг мэдээлжээ. Тэдний үүсгэн байгуулсан Higher Ground компани хөгжмийн зах зээлийн томоохон тоглогчдын нэг Spotify-тай хамтын ажиллагааны гэрээ байгуулсан бөгөөд гэрээний хүрээнд алдарт улстөрчийн гэр бүл контент хөгжүүлэх, үйлдвэрлэх, өөрсдийн дуу хоолойгоо "ашиглуулах" албан ёсны тохиролцоонд хүрсэн байна. 

Барак Обама "Хүмүүсийг инээмсэглүүлж, тунгаан бодуулж, итгэл найдвар өгч, хооронд ойртон дотносох гайхалтай боломжийг подкаст олгох болно" хэмээн мэдэгдлийн үеэр ярьжээ. Харин тэргүүн хатагтай асан Мишель Обама "Маш олон удаа үл тоомсорлуулж, чимээгүй хоцорсон хүмүүсийн дуу хоолойг нийгэмд гаргаж ирэх болно" гэжээ. Харин тэдний подкаст ямар сэдвийн хүрээнд өрнөж, хэзээнээс цацагдаж эхлэх талаар тодорхой мэдээлэл өгөөгүй байна. 

Дашрамд дурдахад, Spotify нь сард 217 сая хүн идэвхтэй ашигладаг, хөгжмийн стримингийн үйлчилгээ үзүүлэгч компани билээ. Харин Обамагийн гэр бүлийн үүсгэн байгуулсан Higher Ground компани 2018 онд Netflix-д кино, телевизийн цуврал, баримтат кино хийж өгөх гэрээ байгуулж байжээ. 

Эх сурвалж: BBC

Б.Саруул 2019.06.07

1498