Бүх Японы оюутны аварга шалгаруулах сүмо бөхийн тэмцээн энэ сарын 3-нд Ойта мужийн Үса хотын спорт цогцолборт боллоо. 56 дахь удаагаа явагдаж буй тус тэмцээнд "Нихон" их сургуулийн 4-р дамжааны оюутан Б.Төрболд түрүүллээ. Тэрбээр өнгөрсөн жил Японы сонирхогчдын сүмогийн ёкозүна цол хүртсэн билээ. Шигшээ барилдаанд түүний өрсөлдөгч нь "Тоёо" их сургуулийн Шираичи байлаа. Барилдаан эхлээд л цүппаридан дайрсан Шираичиг Б.Төрболд тогтоогоод ошитаоши мэхээр ялж, оюутны аваргын тэмцээнд анх удаагаа түрүүлэв. Тэмцээний дараа тэрбээр “Ёкозүна цолтой хүн оюутны тэмцээнд түрүүлэхгүй бол болохгүй. Өнөөдөр сэтгэлдээ хүртэл барилдаж чадаагүй ч ямар ч гэсэн түрүүллээ” гэж ярьжээ.
