Нью-Йорк Таймсын Монгол дахь хамтрач "Анлимитэд медиа групп"-ын эрхлэн гаргадаг "Гэрэг" сэтгүүлийн "Women Today", "Адал явдалч, амьд, адармаат Улаабаатар" тусгай дугаарууд M+ аппликэйшнд үнэгүй байршлаа. Дижитал хэлбэрт орсон сэтгүүлээс Та бүхэн ковер хэрхэн бүтсэн богино хэмжээний видео, сэтгүүлийн нээлтийн ажиллагааны зургуудыг үзэх боломжтойгоос гадна Подкаст, Хөгжим булангийн мэдээллийг унших зууртаа сонсох бас боломжтой.
Бид 2019 онд дэлхийн шилдэг хэвлэлүүдийн нэг Нью-Йорк Таймстай хамтын ажиллагаа эхлүүлж анхны "Women Today" дугаараа гаргасан бөгөөд энэ үеэр тус хэвлэлийн төлөөлөгч болон Пулицерийн шагналт сэтгүүлч Эмили Стийл нар хүрэлцэн ирж нээлтийн ёслолд оролцож байсан билээ.
"Гэрэг" сэтгүүлийн "Women today" тусгай дугаарын нээлт үргэлжилж байна
'Гэрэг' сэтгүүлийн энэхүү тусгай дугаарт АНУ, Герман, Ирланд, Энэтхэгт гэхчлэн олон оронд охид, эмэгтэйчүүдэд тулгамдаж буй асуудлыг хөндсөн 'The New York Times'-ийн шилдэг нийтлэлүүд багтсанаас гадна орчин цагт Монголд тулгамдаж буй асуудлуудтай нүүр тулж буй эмэгтэйчүүдийн хөрөг, түүхээр дамжуулан асуудал, шийдлийг хөндсөнөрөө онцлог юм.
"Адал явдалч, амьд, адармаат Улаабаатар" дугаарт хотын гудамжаар хүүхдүүд өдөр бүр хэрхэн зорчдогийг зураглаж, өргөн чөлөө холбосон хөшөө дурсгалууд юу илэрхийлдэгийг сонжиж, асуудал бүртэй холбогддог хэр нь эрхгүй бидний уламжлалт сууц, магад Улаанбаатарын хамгийн өвөрмөц чимэг гэр хорооллын төрхөө эргэн харж басхүү өдөр хоногуудын урсгалд хүмүүс юу бодож алхдагийг бид хүргэсэн.
ГЭРЭГ-NYT: Адал явдалч, амьд, адармаат Улаанбаатар
Монголын сэтгүүлчдийн нэгдсэн эвлэлийн 2019 оны Шилдэг сэтгүүлээр шалгарсан дээрх дугааруудаа бид дижитал хэлбэрт оруулан M+ аппликэйшнээр уншигчдадаа хүргэх болсондоо баяртай байна. Та бүхэн дэлхийн хаанаас ч, хэзээ ч, илүү сонирхолтой хэлбэрээр сэтгүүлээ уншаарай.