Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмын нээлтийг "Эх дэлхий, эх оршихуй цадиг" сэдвээр дэглэн бүтээжээ. Үндэсний их баяр наадмын нээлтийн ёслол маргааш Төв цэнгэлдэх хүрээлэнд уламжлалт ёсоор морин цагт эхлэх бөгөөд энэ удаа оройн хувилбарыг анх удаа үзэх боломжийг наадамчин олондоо олгож байна. Тайз, дэлгэц хослуулсан энэхүү шинэлэг тоглолт маргааш 22.00 цагт товлогджээ. Тасалбарыг цахимаар 79000-99000 төгрөгөөр худалдах юм байна.
"Эх дэлхий, энх оршихуйн цадиг” агуулгын дор зохион байгуулж байгаа баяр наадмын нээлт, хаалтын тоглолтын ерөнхий найруулагчаар Ц.Батнайрамдал, зохиолчоор О.Цэнд-Аюуш, ерөнхий зураачаар Л.Батбилэг, ерөнхий продюсерээр Г.Маргад-Эрдэнэ нар ажиллаж, нийт 1213 уран бүтээлч оролцоно.
