“Чамайг өглөө хэн ч сэрээхгүй, шөнө хэн ч хүлээхгүй, юу хүссэнээ хийж чаддаг бол эрх чөлөө юу? эсвэл ганцаардал уу?” хэмээн Чарлес Буковски хэлсэн байдаг. Энэ мэдрэмжийг ганцаараа амьдардаг хүмүүс л ойлгох болов уу. Иймд хамтдаа ганцаараа амьдардаг хүмүүсийн л ойлгох 9 зүйлтэй танилцацгаая.
#1 Гэртээ хүссэнээрээ цэвэрхэн эсвэл замбараагүй байж болно
Ганцаараа амьдарна гэдэг хэзээ ч ийм байх ёстой, тийм байх ёстой гэсэн мэдрэмжийг төрүүлэхгүй эрх чөлөө юм. Иймд та хүссэнээрээ гэрээ цэвэрлэхгүй удаж болно бүр аягаа долоо хоног угаахгүй байсан ч болно эсвэл өдөр бүр гялалзтал нь цэвэрлэж ч болно. Бас хамгийн сайхан нь таны цэвэрлэсэн гэрийг танаас өөр хэн ч замбараагүй болгохгүй.
#2 30 цаг ч унтаж болно
Ганцаараа амьдрахын хамгийн сайхан нь чанартай нойр билээ. Сэрүүлэг л дуугарахгүй бол хэн ч таныг сэрээхгүй. Амралтын өдрүүдээр өдөржин унтсан ч болох эрх чөлөө ганцаараа амьдардаг хүмүүст л бий.
#3 Нүцгэн эрх чөлөө
Ганцаараа амьдардаг хүмүүс нүцгэн байхыг эрх чөлөөг утгаар нь эдэлдэг. Нүцгэн унтаж, нүцгэн ариун цэврийн өрөө орж заримдаа бүр нүцгэн хоолоо идэх ч тохиол байна. Тэр бүгдэд хэнээс ч санаа зовохгүй байх хэчнээн сайхан гээч… Гол нь хөшгөө л хаах хэрэгтэй.
#4 Цэвэрлэгээ хийх талаар бодоход ядрах мэдрэмж
Хамгийн эхэнд хүссэнээрээ замбараагүй байж болох талаар дурдсан бол энэ удаад эсрэг мэдрэмжийн талаар бичих гэж байна. Ганцаараа амьдардаг хүмүүс хэдий эрх чөлөөтэй ч гэлээ зарим талаараа багагүй ачааг үүрдэг. Ялангуяа нарийн цэвэрлэгээний ажил буюу тоос арчих, гэрийнхээ өнцөг булан тохой бүрийг цэвэрлэх, хувцсаа угааж индүүдэх гээд л түм буман ажлыг зөвхөн өөрөө хийх шаардлага тулгардаг.
#5 Хөргөгч доторх бүх зүйл таны мэдэлд
Хэн нэгэнд зориулж хүнс цуглуулахгүй зөвхөн өөртөө зориулж юмсыг авч бас мөн түүнийгээ өөрөө л хэрэглэнэ гэхээр гоё байгаа биз.
#6 Өвдөх хамгийн хэцүү
Хэдий ганцаараа амьдрах сайхан ч өвдөх хамгийн хэцүү байдаг. Ямар ч тэнхэл үгүй байхад хоолоо өөрөө хийж, эмийн сан руу явах хэрэг гарна. Гэхдээ эдгэрсний дараа өөрөөрөө бахархдаг шүү.
#7 Санхүүгийн сахилга бат
Ганцаараа амьдрахын мөн нэг давуу тал нь санхүүгийн хувьд хэн нэгэнд найдалгүй өөрөө бүхнийг зохицуулах чадварт суралцах явдал юм. Усны төлбөр, интернэтийн төлбөр, хүнсээ цуглуулах гээд олон төлбөрийг төлөх хариуцлагыг цор ганцаар зохицуулах болно.
#8 Өөртэйгөө ярих нь хэвийн үзэгдэл
Уншихад эвгүй санагдаж байж магадгүй ч энэ бол үнэн юм. Өөртэйгөө, аалзтай эсвэл угаалгын машинтайгаа ярих нь хэвийн л үзэгдэл болж хувирна.
#9 Заримдаа гэр бүлээ санана
Хэдий өөрийн тусгаар тогтнолоо тунхаглаж эрх чөлөөтэй, дураараа амьдарч байгаа ч гэсэн хааяа хэн нэгэнд гомдолломоор, загнуулмаар санагдаж гэр бүлээ санах болно. Ялангуяа зурагтаар гэр бүлийн халуун дулаан зар сурталчилгаа гарахад үнэхээр гунигтай.
