Канадын жүжигчин Киану Ривз Лондон хотод номынхоо нээлтийг хийлээ. Зохиолч Чайн Мьевилтэй хамтран бичсэн “The Book of Elsewhere” роман Ривзийн хувьд анхных нь уран зохиолын ном болж байгаа юм.
Энэхүү романыг Киану өмнө нь өөрөө зохиолч Мэтт Киндт, зураач Рон Гарнитай хамтран, гаргаж байсан "Brzrkr” комиксоосоо сэдэвлэжээ. Романы гол баатар нь үхэшгүй мөнх настай дайчин бөгөөд энэхүү “хараалаасаа” гарахаар мянган жил тэмцэж байгаагаар гарна.
Ривз бол Холливудын хамгийн даруухан од. Тиймээс ч нээлт дээрээ гангалж, гоёсонгүй, жирийн жийнстэй ирсэн байлаа.
Ривз хандив, буяны ажилд байнга оролцдог. “Матрица” киноныхоо цалингийн 70 хувийг хорт хавдар судлалд хандивлаж байлаа. Киноноос гадна тэрээр хэд хэдэн компанитай.
Стивен Хеймелтэй цуг "Company Films” студи байгуулсан. Мөн “Arch Motorcycle” гэдэг мотоцикл үйлдвэрийн компанитай. Саяхан шинэ загвараа танилцуулсан билээ.
