“Атар” хэвийн боовны нэрэмжит аймаг, цэргийн цолтнуудын уламжлалт барилдаан нэгдүгээр сарын 26-ны өдөр 11:00 цагаас Бөхийн өргөөнд явагдана.
Сар шинийн баярт зориулсан цуврал барилдааны эхэнд зохион байгуулдаг эл наадамд түрүүлж, үзүүрлэсэн бөхчүүдээс өдгөө гурав нь аварга, нэг нь гарди, дөрөв нь улсын заан, хоёр нь улсын харцага, 12 нь улсын начинд цолонд хүрчээ.
Эл наадамд өнгөрсөн жил түрүүлсэн Л.Энхсаруул, 2023 онд түрүүлсэн Д.Төрболд нар өдгөө улсын начин цолтой барилдаж байна.
Сонирхуулахад, аймаг, цэргийн цолтой бөхчүүдийн чансааг Сүхбаатар аймгийн хурц арслан Нямдоржийн Өсөхбаяр тэргүүлж байгаа юм. Тэрбээр “Атар” хэвийн боовны нэрэмжит барилдаанд 2022 онд түрүүлсэн бөх билээ.
Харин чансааны дэд байрт Хэнтийн хурц арслан Д.Алтанцоож, Ховдын Ц.Төмөрцоож, Баянхонгорын Ч.Алтангэрэл, Дорнодын М.Бэлгүтэй, Булганы Ц.Мөнхбаяр, Хөвсгөлийн Э.Баасанжав нарын арслангууд эрэмблэгдэж байна.
