“Бага наадам” гэгддэг цагаан сарын барилдааны тасалбар жилийн жилд эрэлттэй байдаг. Монголын үндэсний бөхийн холбооноос хэрэгжүүлж буй шинэчлэлийн хүрээнд энэ жил барилдааны тасалбарыг үзэгчдэд чирэгдэлгүй хүргэх үүднээс shoppy.mn-ээр борлуулсан байна. Улмаар захиалга авч эхэлснээс хойш аравхан минутын дотор бүх тасалбар зарагдаж дуусчээ. Монгол бөхийн өргөөг дүүргэх хэмжээний тасалбар арван минутад зарагдаж дууссан гэхээр Цагаан сарын барилдаан үзэгчдийн дунд ямар их эрэлттэй байгаа нь харагдах биз ээ.
Өмнө нь бөхийн хорхойтнууд цагаан сарын барилдааны тасалбар авахын тулд хэдэн цагаар дугаарлан зогсох, шагчдын гарт олноор очих зэрэг асуудал үүсдэг байсан нь бага багаар цэгцэрч байна.
