Башё болгоны дараа хуралддаг Ёкозүнагийн зөвлөл Токио хотын Кокүгикан ордонд ээлжит хурлаа хийлээ.
Хаврын тэмцээнд озэки Ооносато нэмэлт барилдаанд ялж, 12 даваатай түрүүлсэн билээ. Ёкозүнагийн зөвлөлийн тэргүүнээр өнгөрсөн нэгдүгээр сард томилогдсон Оошима Тадамори “Озэки цолтны үүрэг, хариуцлагыг бүрэн дүүрэн биелүүлж чадлаа. Цаашдаа ахих ирээдүйтэй, итгэл төрүүлсэн бөх гэдэг дээр бүх гишүүн санал нэгтэй байсан. Харин дараагийн башёд ёкозүна цолны болзол сонсгох эсэх дээр ямар нэг зүйл хэлмээргүй байна. Сая хэлсэн итгэл найдвар төрсөн гэдэг үгэнд ийм утга санаа ч агуулагдаж байгаа гэж бодож байна. Ирэх тэмцээнийг хараад, үр дүнг нь үзэж, нухацтай хэлэлцэж байж шийдэхгүй бол болохгүй” гэж тодорхой зүйл хэлэхээс зайлсхийлээ. Ер нь нэлээд хатуу шаардлага тавих бололтой.
Шинэ аварга Хоошёорюү гэмтлийн улмаас Хаврын тэмцээний голоос нь гарсан билээ.
Оошима Тадамори “Маш харамсалтай байсан ч хэн ч гэмтэл бэртлийг ялж чадахгүй тул яах ч аргагүй зүйл байлаа. Ёкозүна өөрөө хамгийн их урам хугарсан нь байх. Ирэх тэмцээнд гэмтлээ эдгээгээд эргэн ирж, аварга хүний хүч чадлыг харуулна гэдэгт итгэж байна” гэж байр сууриа илэрхийлсэн байна.
