Йорданы Амман хотноо явагдаж буй чөлөөт бөхийн Азийн АШТ-ий хоёр дахь өдөр дараах таван жингийн медальтнууд тодорлоо.
Эмэгтэйчүүдийн:
65 кг-д зодоглосон өнгөрсөн оны Азийн АШТ-ий үзүүр бөх Түвшинжаргалын Энхжин эхний тойрогт гоц мөргөж, Өмнөд Солонгосын Бак ЖеонГаэ, Узбекистаны Шахзода Алланязова нарыг даралтаар цэвэр ялснаар аваргын төлөө барилдахаар шалгарч үлдсэн.
Тэрбээр финалд ДАШТ-ий иж бүрэн медальтай Мива Морикаватай барилдаж, 6:2-оор уналаа. Ингэснээр Т.Энхжин Азийн АШТ-д хоёр жил дараалан үзүүрлэв.
53 кг-д хүч сорьсон Азийн АШТ-ий мөнгө, хүрэлтэй Ч.Отгонтуяа тэгшитгэх барилдаанд гоц мөргөөд, Йорданы Ноура Муссаллам Тааибинийг даралтаар буулгаж авсан.
Харин хагас шигшээд Хойд Солонгосын бөх, “Парис-2024” олимпын наадам болон “Ханжоу-2022” Азийн наадмын хүрэл медальтай Чое Хю Гёнд оноогоор цэвэр ялагдлаа.
Улмаар хүрлийн төлөө өсвөр, залуучуудын Азийн АШТ-ий хошой мөнгө, хүрэлтэй Зеинеп Байноватай барилдсан ч оноогоор хожигдов.
57 кг-д барилдсан Азийн АШТ-ий мөнгө, хүрэл медальтай ОУХМ Х.Болортуяа, Вьетнамын Ти Хиен Дангийг даралтаар буулгаж аваад Азийн аварга, U23 насныхны дэлхийн аварга Сара Натамид оноогоор цэвэр хожигдлоо.
Тэрбээр хүрэл медалийн төлөө Хятадын бөх, “Парис-2024” олимпын наадам болон “Ханжоу-2022” Азийн наадмын хүрэл медальтай Кексин Хонтой барилдаад уналаа.
72 кг-д хүч сорьсон Азийн аварга, мөнхүү тэмцээнээс дөрвөн хүрэлтэй З.Болортунгалаг, U20 насныхны ДАШТ-ий үзүүр бөх, мөнхүү ангиллын Азийн аварга Лю Юүкид даралтаар хожигдлоо.
Хятадын бөх нэвтхэн финалдсан учир З.Болортунгалаг, Узбекистаны тамирчин, өсвөр үе болон залуучуудын Азийн АШТ-ий үзүүр бөх Светлана Окназароватай барилдаж, даралтаар цэвэр буулгаж аваад энэхүү тэмцээнээс зургаа дахь медалиа гардав. Тэрбээр Азийн АШТ-ий таван хүрэлтэй боллоо.
62 кг-ын жинд зодоглосон дэлхийн аварга С.Цэрэнчимэд, эхний тойрогт дэлхийн хошой аварга, “Парис-2024” олимпын хүрэл медальтай Нонока Озакитэй учраа таарч оноогоор ялагдсан. Японы бөх хагас шигшээд Хойд Солонгосын тамирчинг дийлээгүй учир С.Цэрэнчимэд Азийн АШТ-ийг өндөрлүүллээ.
Сонирхуулахад, эл тэмцээний эхний өдөр Монголын таван бөх барилдсанаас Б.Мөнхнар, Э.Дэлгэрмаа, Б.Отгонтуяа нар хүрэл медаль атгасан билээ.
