АНУ-ын Ерөнхийлөгч Дональд Трамп дэлхий ертөнцтэй худалдааны дайн хийхээр шийдвэрлэжээ. Тэрээр гадаадын бүх бараанд татвар ногдуулах болсноо баяр ёслолын байдалтай зарлаж, өнгөрсөн зуунаас хойш гараагүй том алхам, АНУ-ын түүхэн дэх агуу өдрийн нэг хэмээн нэрийдлээ. Энэ дайнд холбоотон, дайсан, нөхөрсөг харилцаатай орон бүгд ямар ч ялгаагүй хамрагджээ. Худалдааны дайн хийснээр анд найз, сөргөлдөгч дайсан бүгд АНУ-д буулт хийж, зарим орон газар нутгаа өгч, нэг хэсэг нь мөнгөн төлбөр төлөх учиртай ажээ.
“Өнөөдөр АНУ дахин сэргэн мандсан өдөр. Энэ бол Америкийн эдийн засгийн эрх чөлөөний тунхаг бичиг. Бид Америкийг дахин агуу, баян, хүчирхэг болгоно. Манай орныг 50 жил дэлхий даяараа хуваан идлээ. Дахиж тийм явдал болохгүй” гэж Трамп мэдэгдсэн.
Хятадын эсрэг 34 хувийн татвар, Европын холбоо 20%, анд найз Израилдаа 17 хувь, Японы эсрэг 24%, Вьетнам, Мьянмар гэсэн жижиг орнуудад 50 хувийн татвар онооно. Ер нь дэлхийн бүх орон энэ “шийтгэл” өртсөн, хамгийн бага татвар нь 10 хувь байгаа. Энэ зарлиг нь дөрөвдүгээр сарын 9-нөөс үйлчилж эхлэх юм. Гэхдээ хэнтэй ч гэрээ хэлэлцээр хийхэд бэлэн, харин шинэ татвар таалагдахгүй байгаа улсууд “өөрсдөө мэд” гэж сүрдүүлээд бас амжсан байгаа. Ямар ч гэсэн татварын бодлогоо хэрэгжүүлэхээр Онц байдал зарлалаа.
Шинэ татварын хэмжээ
Хятад — 34%;
Европын холбоо — 20%;
Энэтхэг - 26%;
Вьетнам — 46%;
Тайвань — 32%;
Япон — 24%;
БНСУ — 25%;
Таиланд — 36%;
Швейцар — 31%;
Индонез — 32%;
Малайз — 24%;
Камбож — 49%;
Их Британи — 10%;
ӨАБНУ — 30%;
Бразил — 10%;
Бангладеш — 34%;
Сингапур — 10%;
Израиль — 17%;
Филиппин — 17%;
Чили — 10%;
Пакистан — 29%;
Шри-Ланк — 44%;
Казахстан — 27%;
Серби — 37%;
Мадагаскар — 47%;
Мьянмар — 44%;
Лаос — 48%.
Хамгийн их татвар болох 50 хувийг Лесото болон Францын Сен-Пьер, Микелонд оноожээ. Харин Украин, Гүрж, Азербайжан, Армени, Туркменистан, Монгол, Кыргызстан, Тажикстан 10% татвар хүлээх болж байна.
Яагаад Трамп дайн зарлав?
Юуны өмнө АНУ бол дэлхийн хамгийн том эдийн засаг тул бүгд Америктай худалдаа хийхийг хүсдэг. Харин тэд Америкаас бараа худалдан авахаасаа илүү Америкт бараа зараад байдаг гэж Трамп үзэж байна. Тэгсэн мөртөө гадаад орнуудын татвар өндөр. Энэ удаад хариу барьснаар “тоглоомын дүрэм” шударга болно гэж тэр хэлсэн. Энэ дайнд Трампын гол гурван бай нь Европын холбоо (дэлхийн 2 дахь том эдийн засаг), Хятад (3 дахь), Канад, Мексик хоёр (хөрш дайснууд). Энэ гурван “дайсан” АНУ-ын гадаад худалдааны алдагдлын гол үндэс гэж Трамп үзэж байна.
