Улс орондоо цэргийн онц байдал зарлах гэсэн бүтэлгүй оролдлого хийснээсээ дөрвөн сарын дараа БНСУ-ын Ерөнхийлөгч Юн Сок Ёл салахгүй зууралдсан албан тушаалаасаа саллаа. Тус улсын Дээд шүүхээс түүний импичментийг хүчин төгөлдөр үлдээж, Ерөнхийлөгчийн суудлаас бүр мөсөн буулгав.
Нийт найман шүүгч оролцсон Шүүх хурлаар “Онц байдал зарлах шийдвэр нь Үндсэн хуулийг зөрчсөн, хууль ёс, ардчиллын зарчимд харшилсан шийдвэр байлаа” гэж санал нэгтэй үзжээ. Ингэснээр 60 хоногийн дотор шинэ Ерөнхийлөгчийн сонгууль явагдах боллоо.
Хэргийг сануулахад, өнгөрсөн оны 12 дугаар сард Юн дайны онц байдал зарласан ч парламентаас үүнийг нь төрийн эргэлт хийх оролдлого гэж үзээд Ерөнхийлөгчид импичмент зарласан билээ. Гэвч түүнийг албан тушаалаас нь буулгахад Дээд шүүхийн шийдвэр хэрэгтэй байв. Энэ хооронд Юн Ерөнхийлөгч хэвээр үлдэж, “Сөрөг хүчин Засгийн газрын ажлыг боомилж байсан тул онц байдал зарласан. Төрийн эргэлт хийх гээгүй” хэмээн өөрийгөө өмгөөлж байлаа. Мөн байцаалт өгөхгүй, бие хамгаалагч нартай цагдаа нарыг оруулахгүй байх тушаал өгсөн байлаа.
Юн Сок Ёл-ын өмгөөлөгч нар шүүх хурал шударга бус явагдсан гэж мэдээлээд байна.
Юн Сок Ёл 47,85% саналаар ялж, 2022 оны тавдугаар сард Ерөнхийлөгч болсон. Түүний засаглалын үед Өмнөд, Хойд Солонгосын харилцаа түүхэндээ хамгийн хурцадмал байдалд очиж, бараг дайн эхлэх дөхсөн. Ерөнхийлөгч Юн АНУ-тай хамтарсан цэргийн сургуулийг маш олон хийж байгаа, Хойд Солонгосын эсрэг сурталчилгааг хэтрүүлсэн гэж сөрөг хүчин үзэж байгаа юм.
