Тайландын Бангкок хотноо дөрөвдүгээр сарын 25-27-ны өдрүүдээр явагдах жүдо бөхийн Насанд хүрэгчдийн Азийн аварга шалгаруулах тэмцээнд зодоглохоор 23 орны 220 бөх мэдүүлгээ ирүүлээд байна.
Энэхүү тэмцээнд Монголын 18 бөх хүч сорих юм.
Эрэгтэйчүүдийн:
60 кг-ын жинд өсвөр үеийнхний Азийн АШТ-ий мөнгө, хүрэл медальт Б.Сүхбат,
66 кг-д өнгөрсөн оны Азийн аварга, Их дуулга ангиллаас зургаан медальтай Б.Эрхэмбаяр,
73 кг-д өнгөрсөн оны ДАШТ-ий хүрэл медальтай Л.Анхзаяа, бага дэлхийн аварга гэгддэг Парисын Их дуулга тэмцээний хүрэлтэй О.Уранбаяр нар,
81 кг-д Ази болон Далайн орнуудын залуучуудын АШТ-ий үзүүр бөх О.Шинэбаяр,
90 кг-ын жинд 2022 онд Актау хотноо явагдсан Азийн нээлттэй тэмцээний аварга Б.Мөнхбаяр,
-100 кг-д Ази болон Номхон далайн орнуудын залуучуудын АШТ-ий хүрэлтэй Б.Хүдэрчулуун, өсвөр үеийнхний Азийн АШТ-ий үзүүр бөх, мөнхүү тэмцээний залуучуудын ангиллаас хүрэлтэй А.Энхбаяр нар,
+100 кг-д Азийн наадмын үзүүр бөх, Азийн АШТ-ий хошой хүрэл медальтай Б.Гончигсүрэн барилдана.
Эмэгтэйчүүдийн:
48 кг-ын жинд 2022 оны Азийн АШТ-ий хүрэл медальтай, Их дуулга ангилалд хоёр түрүүлж, мөнхүү тэмцээнээс найман медаль ганзаглаад буй Г.Наранцэцэг,
52 кг-ын жинд өсвөр үеийнхний ДАШТ-ий хүрэлтэй, мөнхүү ангиллын Ази тивийн аварга, өнөө жил Насанд хүрэгчдийн УАШТ-ий түрүү бөхөөр тодорсон М.Нандин-Эрдэнэ, залуучуудын Азийн АШТ-ий хүрэл медальтай Б.Уранзаяа нар,
57 кг-д өсвөр үеийнхний дэлхийн аварга, Токиогийн Их дуулга тэмцээний хүрэл медальтай Т.Ариунзаяа,
63 кг-ын жинд ДАШТ-ий хошой хүрэлтэй, өнгөрсөн оны Азийн аварга Л.Энхрийлэн,
70 кг-д өнгөрсөн оны Азийн АШТ-ий хүрэл медальтай, “Ханжоу-2022” Азийн наадмын V байрын шагналт, өсвөр үеийнхний ДАШТ-ий хүрэлтэй Б.Ням-Эрдэнэ, өсвөр үеийнхний Азийн АШТ-ий үзүүр бөх Д.Есүй нар,
-78 кг-д өсвөр үеийнхний Ази тивийн аварга А.Дуламсүрэн,
+78 кг-ын жинд өнгөрсөн оны Азийн АШТ-ий үзүүр бөх, “Ханжоу-2022” Азийн наадмын хүрэлтэй, Их дуулга ангиллын хошой мөнгөн медальтан А.Адьяасүрэн зодоглох юм.
