Ирэх Даваа гарагт Словакийн нийслэл в Братислав хотод Европын аварга шалгаруулах сонгомол барилдаан, чөлөөт бөхийн тэмцээн эхэлнэ. Гурван төрөлд нийт 450 бөх мэдүүлгээ өгсөн бөгөөд ОХУ-ын шигшээ баг Завур Угуев (61 кг), Заурбек Сидаков (74 кг), Абдулрашид Садулаев (97 кг) гэсэн олимпын аваргуудтай хүчирхэг багаа илгээнэ гэж байсан. Харамсалтай нь багийн ахлагч, Орос Танк Абдулрашид Садулаевт Шенгений виз өгөөгүй тул тэмцээнд оролцож чадахгүй боллоо. Ийм байдал өмнө нь ч гарч байсан, хэрэв цаашдаа үргэлжилбэл алдарт бөх олон улсын тэмцээнд дахиж барилдахгүй байж магадгүй болоод байна.
ОХУ-ын баг Садулаевын оронд Магомед Курбановыг барилдуулахаар дуудсан байна. Орос Танк өнгөрсөн жил Румынд болсон Европын АШТ-д мөн оролцож чадаагүй. Түүнийг онгоцны буудлаас буцааж байсан билээ. Тэр үед мөн хасагдаж байсан Завур Угуев, Заурбек Сидаков нарт энэ удаа саад учирсангүй.
ОХУ-ын Спорт бөхийн холбооны тэргүүн Михаил Мамиашвили “Садулаевт виз олгохоос татгалзсан нь энэ тэмцээний нэр хүндийг унагаалаа. Словакийн бөхийнхөн, Спортын яам, ГХЯ-ныхан чадах чинээгээрээ хөөцөлдсөн ч барсангүй. Өчигдөр л бидэнд виз боломжтой гэж байсан бол өнөөдөр Садулаев Шенгений орнуудад орох хоригтой гэлээ” гэж сэтгүүлчдэд мэдээллээ.
