2 мин

Энэ намрын эморлын хөтөч: Унших ном, сонсох дуу, үзэх кино...

Г.Сүрэн 2021.09.27 1

8

"Навчис цэцэгс болон хувирдаг учраас намар бол өөр нэгэн хавар юм" гэх гүн ухаанч Альбер Камюгийн үг бий. Өнгө өнгийн навчис, дулаахан хүрэм, халуун уух зүйл, сэрүүхэн цаг агаар, сүүлчийн бороо, анхны цастай намар бүр шинэхэн. Энэ намар сэтгэлд тань дулаахан тэврэлт шиг мэдрэмж төрүүлэх дуу, унших ном, үзэх киног санал болгож байна. 

1. Дуу

Б.Бадрууган - Сэрүүн цэцэгс

Саргүй шөнийн сувдан шүүдрийг

Шимсэн цэцэгс сэрүүн байна

Сэтгэлтэй чамдаа хэлсэн үгийг

Сэрүүн цэцэгс сонссон болов уу...

Simon & Garfunkel - Leaves That Are Green

Энэ дууг бичихдээ би хорин нэгтэй байлаа

Одоо харин хорин хоёртой болжээ, энэ ч төд удахгүй

Цаг хугацаа яарсаар байна...

Ногоорох навчис хүрэнтэж эхэлнэ

Салхитай хамт хаа нэг тийш зүглэнэ

Алган дээр чинь эмтрэн үйрнэ...

Playlist: Аз жаргал, дулаан мэдрэмж төрүүлэх "алтан шаргал" 18 ДУУ

2. Кино

Ким Ки Дук - "Хавар, зун, намар, өвөл…дахиад хавар” (2003)

Ээлжлэн солигдох улирал, зэнгийн мөн чанар, аядуу тайван ахуй, хавар, зун, намар, өвөл, тэгээд хавар... Намрын улиралд магадгүй юмс хамгийн ихээр хувьсан өөрчлөгддөг. Сэрүүхэн намрын үдэш сэтгэл, зүрх гарган үзэх кино.

Х.Дамдин - "Мартагдашгүй намар" (1975)

Монголын намар цаг, оюутан ахуй, дурсамж, залуу нас, хөдөлмөр, хүсэл бодлын тухай өгүүлэх алтан үеийн уран бүтээл. Гэхдээ энэ удаа илүү "тогтож", үзэгдэл бүрийг нь анхааран үзмээр... 

3. Ном

Ц.Дэлгэрмаа - "Зүрхэнд агч Намур"

Хайрлахад, хамаг сэтгэлээрээ хайрлахад зориг хэрэгтэй.

Халирч, хальсан дороо нуугдаж,

Үг хэлгүй цэмцгэр алхахад

Өв тэгш жаргалтай харагдахад

Хайлуулж, чамайг урсгадаг хайр л илүүдэж мэднэ...

Б.Батзаяа - "Баяртай гуниг минь"

Харсаар байтал зуны сарууд яг дэргэдүүр минь өнгөрч

Хачин уйтгартай ч нэг л танил шаргал өдрүүд ээлжилнэ

Навчис, шувууд, дурлалууд надаас холдоод явахын цагт

Намрын бороо зуных шиг шивэрч сэтгэл үймүүлэх чинь юу вэ?

Г.Сүрэн 2021.09.27

8