Ц.Содномдорж: Б.Орхонбаярыг Төрийн наадамд түрүүлнэ гэдэгт итгэдэг
Өнөө жилийн Үндэсний их баяр наадмын хүчит бөхийн барилдаанд Оргихын Хангай түрүүлж улсын аварга, Баярсайханы Орхонбаяр үзүүрлэн улсын арслан цол хүртсэн билээ. Бөхийн барилдааны долоогийн даваанд улсын арслан Ц.Содномдорж, Б.Орхонбаярыг амлан авсан нь олныг гайхшируулсан. Гэвч тэрбээр барьцыг элбэг өгч, мэхийг нь хорьж зогсохгүйгээр Б.Орхонбаяр арсланд өвдөглөсөн юм. Үүнээс өмнө Ц.Содномдорж арслан Б.Орхонбаяртай хоёр удаа таарч, давж байв. Тухайлбал, 2019 оны баяр наадмаар түүнийг улсын начин цол хүртээд байхад нь зургаагийн даваанд амлаж хаясан байдаг.
Өчигдөр Ц.Содномдорж арслан түүнийг өнөө жил амлаж авсан талаараа мэдээлэл өгөв. Тэрбээр "Б.Орхонбаярын ээж нь Хөвсгөл аймгийн Тосонцэнгэл сумынх. Би арсланг дэмжээд сайн сэтгэлээр гар амар давуулсан. Дүү маань сайхан барилдаж ахынхаа цолонд хүрлээ. Б.Орхонбаярыг би Төрийн наадамд нэг юм уу, хоёр түрүү хүртэнэ гэж итгэдэг. Нас залуу байна, олон наадамд түрүүлнэ байхаа" хэмээн ярьсан юм. Баярсайханы Орхонбаяр:
20 настайдаа Аймгийн арслан
21 настайдаа Аймгийн арслан цолоо баталж, мөн тухайн үед аймгийн арслан цолтой байсан Ц.Сандагдорж начинтай тунаж барилдаад Улсын начин
22 настайдаа Улсын харцага
24 насандаа Улсын арслан цол хүртлээ.