1 мин

М.Номин-Эрдэнэ Сахад явагдсан чөлөөтийн олон улсын тэмцээнд түрүүллээ

У.Чинзориг 2024.03.12 1

Оросын чөлөөт бөхийн домогт тамирчин, олимпын аварга Роман Дмитриевийн нэрэмжит  залуучуудын олон улсын тэмцээн Саха улсад явагдаж байна. 

Уг тэмцээнд Орос, Азербайжан, Армен, Беларусь, Грек, Энэтхэг, Иран, Казахстан, Киргизстан, Монгол, Молдав, Узбекистан зэрэг 12 орны тамирчид хүч сорьж байгаа юм. 

Монголын тамирчдаас эмэгтэйчүүдийн 55кг-д зодоглосон М.Номин-Эрдэнэ алтан медаль хүртсэнээр, Якутын тэнгэрт төрийн дууллаа эгшиглүүлжээ. Тэрбээр өсвөр үе болон 23 хүртэлх насны ангилалд Монгол Улсын аваргаар тодорсон тамирчин билээ.

Мөн А.Даваажаргал эмэгтэйчүүдийн 65 кг-д хүрэл медаль, эрэгтэйчүүдийн 86кг-д Т.Дэмчигдорж мөнгөн медаль зүүсэн байна. А.Даваажаргалын хувьд, өсвөр үе, залуучуудын УАШТ-д дөрвөн удаа түрүүлсэн, 15 хүртэлх насны Азийн АШТ-ий хүрэл медальтай тамирчин. 

Харин Т.Дэмчигдорж бол өсвөр үе болон залуучууд, мөн 23 хүртэлх насны Монгол Улсын аварга, Насанд хүрэгчдийн Улсын аваргын хошой хүрэл медальтай бөх юм.

Алдарт бөх Роман Дмитриевийн нэрэмжит энэхүү тэмцээн нь 10 дахь удаагаа зохион байгуулагдаж байгаа бөгөөд энэ жил хоёр сая рублийн шагналын санг амлажээ.

У.Чинзориг 2024.03.12