Парисын олимпын үеэр 300,000 бэлгэвч тараана
Энэ зуны Парисын наадамд скейтборд, серфинг зэрэг дөрвөн шинэ спортын төрөл нэмэгдээд байна. Тэгвэл францчуудын "өрөөний спорт" гэж нэрлэдэг өөр нэгэн бие бялдрын спорт олимпын наадамд эргэн иржээ.
Ковидын цар тахал дэгдсэнтэй холбоотойгоор 2021 оны Токиогийн олимпын үеэр тамирчдыг бэлгийн харилцаанд орохыг хориглож байсан. Тэгвэл Парисын олимпоор энэ хоригийг цуцлаад зогсохгүй 300,000 бэлгэвч тараахаар болжээ.
Олимп, паралимпийн тамирчид байрлаж буй виллажийн захирал Лорен Мичауд "Бидний гол зорилго бол олимпод оролцож буй 14,000 гаруй тамирчин, ажилтнууд болон хэвлэлийнхэнд урам зориг, тав тухтай байдлыг бий болгох юм" гэжээ. Харин согтууруулах ундааг хориглож байгаа аж.
Түүний ярьж буйгаар олимпын үеэр бэлгэвч тараах уламжлал 1988 оны Сөүлийн олимпоос эхэлжээ. Тухайн үед ХДХВ/ДОХ-ын талаарх мэдлэгийг дээшлүүлэх зорилгоор 8500 орчим бэлгэвч тарааж байсан аж. Дараа дараагийн олимпоор энэ уламжлал хадгалагдаад зогсохгүй тараах бэлгэвчийн тоо нэмэгджээ. Тухайлбал, 2000 оны Сиднейн олимпын үеэр зохион байгуулагчид 70,000 бэлгэвч тараасан боловч хүрэлцээгүй тул нэмж 20,000 бэлгэвч захиалж байжээ. 2016 оны Риогийн олимпын үеэр 450,000 бэлгэвч тараасан нь олимпын түүхэн дэх хамгийн өндөр тоо юм.
Эх сурвалж: Yahoo