23 настай Сандро Тоналиг 50 удаа бооцоо тавьсан хэрэгт буруутгалаа
"Ньюкасл" клубийн хагас хамгаалагч Сандро Тоналиг Английн хөлбөмбөгийн холбооноос мөрийтэй тоглоомын дүрэм зөрчсөн гэх үндэслэлээр буруутгажээ.
23 настай Тонали 2023 оны 8-р сарын 12-ноос 10-р сарын 12-ны хооронд явагдсан 50 тоглолтод бооцоо тавьсан аж.
"Ньюкасл" Тоналиг өнгөрсөн зун "АС Милан" багаас 55 сая фунтээр эгнээндээ элсүүлсэн юм.
Түүний хөлбөмбөг тоглох эрхийг өнгөрсөн оны 10-р сараас эхлэн 10 сарын хугацаатайгаар түдгэлзүүлээд байв. Өдийг хүртэлх хугацаанд эл хориг зөвхөн Италийн хөлбөмбөгт үйлчилж байсан ч, ФИФА-гаас олон улсад болгон өөрчиллөө. Улмаар Тонали 2024 оны наймдугаар сар хүртэлх хугацаанд хөлбөмбөгийн талбайд гарах боломжгүй гэсэн үг. Тэрбээр хориг тогтоосон хугацаанд ямар ч тоглолтод оролцох эрхгүй ч "Ньюкасл" багийн бэлтгэлд хамрагдах боломжтой.
Ингэснээр Итали тоглогчийн хувьд, ирэх зун явагдах Европын АШТ-ийг өнжихөөр болж байна.
Тэрбээр мөн 20,000 еврогийн торгууль төлж, найман сарын туршид мөрийтэй тоглоомын донтолтоос ангижруулах эмчилгээнд хамрагдах юм.
Тонали дорж хаяж 16 удаа олон нийтийн өмнө гарч, мөн залуу тоглогчдод мөрийтэй тоглоомын хор хөнөөлийн талаар ярихаар болж байна.
Тэрбээр энэ улиралд Эдди Хоугийн багийн төлөө 12 тоглолтод оролцсон.
Өнгөрсөн жил "Брентфорд" багийн довтлогч Иван Тони Английн хөлбөмбөгийн холбооны бооцооны дүрмийг 232 удаа зөрчсөн хэргээр найман сарын хугацаанд хөлбөмбөг тоглох эрхээ хасуулсан. Тэрээр нэгдүгээр сард талбайд эргэн ирсэн юм.