Монголын багууд 3х3 сагсан бөмбөгийн Азийн цомын эхний тоглолтдоо хожлоо
Сингапур улсад гуравдугаар сарын 27-31-ний өдрүүдээр 3х3 сагсан бөмбөгийн Азийн цомын тэмцээн явагдаж байна.
Монголын эрэгтэй шигшээ хэсгийн эхний тоглолтоо Шри Ланкийн эсрэг хийж, 15:13-аар хожлоо. Монголын багийн бүрэлдэхүүнд А.Ананд, А.Азбаяр, Ч.Тэмүүлэн, С.Биндэрьяа нар тоглож байна. Тэд дараагийн тоглолтоо Тайландтай хийнэ.
Монголын шигшээ өнгөрсөн жил Австралийн багийн 24 дараалсан хожлыг тасалж Азийн хошой аваргаар тодорсон билээ. Тус тоглолт 18:18-аар тэнцээд байх үед А.Ананд хоёр онооны шидэлтийг амжилттай гүйцэтгэн нэмэлт алдаа авч, торгуулийн шидэлт нь шийдвэрлэх үүргийг гүйцэтгэсэн юм.
Харин Монголын эмэгтэй баг хэсгийн эхний тоглолтоо Малайзын эсрэг хийж, 21:4 харьцаатайгаар илт давуу яллаа.
Эмэгтэй багийн бүрэлдэхүүнд Б.Ариунцэцэг, Ө.Индра, О.Хулан, М.Цэрэнлхам нар тоглож байна. Тэд хасагдах шатнаа тоглох нь нэгэнт тодорхой болсон агаад хэсгийн сүүлийн тоглолтоо Филиппины эсрэг хийх хуваарьтай байна.