1 мин

Дэлхийн хошой аварга Криста Дэгүчи Их дуулга ангилалд 10 дахиа түрүүллээ

У.Чинзориг 2024.03.30

Туркийн Анталъя хотноо 93 улсын 628 жүдоч чуулж, Их дуулга тэмцээнд өрсөлдөж байна.

Өчигдөр буюу тэмцээний эхний өдөр 57 кг-ын жинд зодоглосон дэлхийн хошой аварга Криста Дэгүчи Их дуулга ангилалд 10 дахь түрүүгээ дархаллаа.

Тэрбээр Австрийн Лаура Каллингер, Африк тивийн аварга Мариана Эстевэс, өсвөрийн дэлхийн аварга, залуучуудын олимпын наадмын хүрэл медальт Ким Жүхэ нарыг ялж, хэсгээ тэргүүлсэн.

Улмаар хагас шигшээд энэ оны эхээр Парисын Их дуулгын финалд түүнийг ялсан Файза Мокдарыг, финалд Анталъягаас гурван жил дараалан медаль хүртэж буй Жессика Лимаг ялж, түрүүллээ.

Лима Анталъягийн Их дуулгаас хошой хүрэл медаль хүртээд байсан бол энэ удаад анхны мөнгөн медалиа зүүсэн юм. Тэд сүүлийн хоёр жилд дөрөв дэх удаагаа учраа тааран барилдахад Дэгүчи бүгдэд нь яллаа.

Харин эл жинд Монголоос өрсөлдсөн О.Оюунгэрэл тэгшитгэх барилдаанд Оросын Ольга Мухинад ялагдаж, тэмцээнээ өндөрлүүлсэн юм.