Дэлхийн аварга П.Орхон "Парис-2024" олимпын эрхээ авахад ганцхан даваа үлдлээ
Киргизстаны Бишкек хотноо чөлөөт бөхийн төрлөөр "Парис-2024" олимпын эрх олгох Азийн бүсийн тэмцээн хоёр дахь өдрөө үргэлжилж байна.
Өнөөдөр эмэгтэйчүүд дэвжээнд барилдсан юм. Монголоос дөрвөн бөх хүч сорьсноос дэлхийн аварга П.Орхон ганцаархнаа хагас шигшээ барилдаанд шалгарлаа. Тэрбээр үдээс өмнө Узбекистаны Гулмира Айтмуратоваг оноогоор цэвэр ялсан.
Харин олимпын эрхийн төлөөх шийдвэрлэх барилдаанаа 20:00 цагаас Өмнөд Солонгосын Ханбит Ли-тэй хийнэ.
Монголоос одоогоор чөлөөт бөхийн төрөлд Д.Отгонжаргал, Э.Дэлгэрмаа, Б.Бат-Эрдэнэ, М.Лхагвагэрэл нарын дөрвөн тамирчин олимпын эрхээ аваад буй юм. Сонирхуулахад, 5-р сарын 9-12-ний өдрүүдээр Туркийн Истанбул хотноо олимпын эрх олгох сүүлчийн тэмцээн явагдана.