Улсын заан Б.Бат-Өлзий Архангай аймгийн Жаргалант сумын 100 жилийн ойн барилдаанд түрүүллээ
Өнөөдөр бөхийн өргөөнөө Архангай аймгийн Жаргалант сумын 100 жилийн ойд зориулсан, улсын арслан Баатарын Төрбат, улсын харцага Арцын Гончиг, улсын начин Готовын Баасанжав нарын нэрэмжит улс, аймгийн цолтой 128 бөхийн барилдаан болж өндөрлөв.
Эл барилдаанд Ховд аймгийн Зэрэг сумын харьяат улсын заан Баярхүүгийн Бат-Өлзий долоо давж түрүүллээ.
Баргийн мэхэнд барьц алддаггүй, тун нягт барилддаг Б.Бат-Өлзий зааныг хазайлгана гэдэг ямар ч бөхөд бэрх даваа. Ялангуяа дүүрэн барьцанд хүрчихсэн үед барилдаан түүнийх боллоо л гэсэн үг.
Тэрбээр 2024 он гарснаас хойш гурав дахь барилдаандаа түрүүлсэн нь энэ.
Харин үзүүрт, Архангай аймгийн Булган сумын харьяат улсын арслан Р.Пүрэвдагва үлдэв. Түүний хувьд, дөрөвдүгээр сард явагдсан Архангай аймгийн сумдын түүхт ойд зориулсан гурван ч барилдаанд дараалан үзүүрлээд байна.
Их шөвөгт улсын үнэн зоригт харцага Б.Зоригтбаатар, улсын өсөх идэр начин Э.Даш нар шалгарлаа.