Тухел бол Свен-Горан Эриксон, Фабио Капелло нараас хойш Гурван арсланг дасгалжуулах гурав дахь Британи бус гаралтай төдийгүй анхны Герман мэргэжилтэн юм.
Английн шигшээ “Евро-2024” тэмцээний финалд Испанийн багт хожигдсон тул өмнөх дасгалжуулагч Гарет Саутгейтийг ажлаас нь халсан билээ. Харин түүнээс хойш тус улсын шигшээг Ли Карсли түр удирдаж байв.
Карсли ирэх сард Грек болон Бүгд Найрамдах Ирландтай хийх тоглолтуудад Английн багийг дасгалжуулах бол түүний дараагаас Тухел үүрэгт ажлаа хүлээж авах юм.
Мэдээж Тухелийн гол зорилго бол Америк, Канад, Мексик улсуудыг дамнан зохион байгуулагдах 2026 оны ДАШТ-ий урьдчилсан шатнаа тэргүүлэх явдал.
Английн хөлбөмбөгийн холбооны удирдлагууд Тухелийн өмнө “Манчестер Сити”-гийн дасгалжуулагч Пеп Гуардиолатай холбогдсон ч, татгалзсан хариуг хүлээж авсан.
Тухелийн хувьд, 2021 оны нэгдүгээр сараас 2022 оны есдүгээр сарын хооронд “Челси” клубийг удирдаж байсан тул Английн хөлбөмбөгийг нэвтэрхий сайн мэддэг.
Өдгөө 51 настай тэрбээр Цэнхэрүүдийн хамтаар Аваргуудын лиг, Клубүүдийн ДАШТ, Европын Супер цомын тэмцээнүүдэд түрүүлсэн юм.
Түүнчлэн “Байерн Мюнхен”, “Парис Сент-Жермен”, “Боруссиа Дортмунд” тэргүүтэй Европын шилдэг клубүүдэд ажиллаад амжсан билээ.
