Хөлбөмбөгийн тоглолтын үеэр үзэгчдийн суудалд тухлангаа согтууруулах ундаа хэрэглэх явдлыг Английн эмэгтэйчүүдийн хоёрдугаар зэрэглэлийн тэмцээний тоглолтод туршина гэж “Women's Professional Leagues Limited” компанийн тэргүүн пүрэв гарагт мэдэгдлээ.
Танхайн гэмт хэргийг таслан зогсоохын тулд Английн эрэгтэйчүүдийн хөлбөмбөгийн топ таван лигийн тоглолтуудын үеэр цэнгэлдэхэд согтууруулах ундаа хэрэглэхийг хориглосон нь 1985 оноос эхлэлтэй.
Хэдийгээр Засгийн газрын уг хууль тогтоомж эхэн үедээ зөвхөн эрэгтэйчүүдийн хөлбөмбөгт хамааралтай байсан ч, удалгүй эмэгтэйчүүдийн хөлбөмбөгийн топ хоёр лигт ч мөн ижил дүрэм үйлчлэх болсон.
“Бид энэ улирлын Чампионшип дивизоны тоглолтуудын үеэр үзэгчдийн суудалд согтууруулах ундаа хэрэглэхийг турших болно. Эмэгтэйчүүдийн хөлбөмбөгийн дэмжигчид зан байдлын хувьд төлөвшссөн гэж боддог. Гэлээ ч энэ бол үзэгчдийн аюулгүй байдлыг бүрэн дааж, нөгөө талаас хариуцлагатай хэрэглээнд итгэж буй учраас шийдсэн сонголт юм”.
Одоогоор уг туршилтыг ямар клубүүдийн тоглолтод хэрэгжүүлэхийг хараахан шийдээгүй байна.
Эмэгтэйчүүдийн Супер лигийн багууд зарим тоглолтоо эрэгтэйчүүдийн клубүүдийн цэнгэлдэх хүрээлэнд явуулдаг ч харин Чампионшип дивизоны багуудын тэн хагас нь 2000 болон түүнээс цөөн үзэгчийн багтаамжтай жижиг талбайд тоглодог.
Мэдээж согтууруулах ундаа худалдахыг туршиж буй нь эмэгтэйчүүдийн хөлбөмбөг дэх үзэгчдийн тоог нэмэгдүүлэх зорилготой билээ.