ДАШТ-ий хүрэл, Азийн наадам болон Азийн АШТ-ий алтан медальт, гавьяат тамирчин Э.Цэндбаатар өнөөдөр буюу 28 насныхаа төрсөн өдөртэй таширлан мэргэжлийн боксын рингэнээ 11 дэх тулаанаа хийлээ.
Тэрбээр эхний 10 тулаандаа дараалан ялсныхаа тавд нь хүнд цохилтоор өрсөлдөгчөө буулгаж аваад байв.
Тэгвэл энэ удаад мэргэжлийн рингэнээ 16 тулалдахдаа 15 ялсан Доминиканы боксчин Френси Фортунатог илүүрхэн ялснаар мэргэжлийн боксод 11 дараалан яллаа.
Э.Цэндбаатар эл тулааны дараа “Сайн тамирчинтай тулалдлаа. Цохилт гойд даадаг юм байна, хоёрдугаар раундад урд гар маань бяцарчихсан. Гэлээ ч заавал ялж, бүс өвөрлөх учиртай гээд хичээсэн маань үр дүнд хүрлээ. Би энэ тулаанд маш сайн сахилга баттайгаар бэлдсэн. Өнөөдөр ялсан ч хугацаа алдалгүй шууд бэлтгэлээ үргэлжлүүлнэ, би. Тусалж дэмждэг бүх хүмүүст баярлалаа” хэмээн ярьсан юм.
