Английн Премьер лигт дөрөв дараалан түрүүлээд буй “Манчестер Сити” клубийн хувьд 2024-25 оны улирал тийм ч ээлтэй эхэлсэнгүй.
Тэд 2024 оны сүүлчийн тоглолтодоо “Лейстер”-ийг буулгаж авсан ч, түүнээс өмнөх 13 тоглолтодоо ердөө ганцхан удаа хожсон билээ. Иймээс энэ сард нээгдсэн солилцоо наймааны зах зээлд идэвхтэй ажиллах багуудын тэргүүн эгнээнд бичигдэж байна.
Ямартаа ч тэдний эхний сонголтоор “Айнтрахт Франкфурт”-ын Омар Мармуш, “Аталанта”-гийн Эдерсон нар тодорчээ.
Омар Мармуш энэ улирлын Бундес лиг дэх гялалзсан тоглолтоороо хэдийн том багуудын анхааралд өртөөд байгаа бол Эдерсоныг авснаар Родригийн хоосон орон зайг нөхөх гэнэ.
Египетийн хөлбөмбөгчин Мармуш 2024-2025 оны улиралд 13 гоол оруулж, 8 гоолын дамжуулалтыг бүртгүүлээд байна. Европын таван лиг дэх тоглогчдоос гагц Мохамед Салах л энэ улиралд түүнээс илүү бүтээмжтэй тоглож буй.
Харин Эдерсон өвлийн амралтын үеэр “Атланта” клуб Италийн Сери А лигийг тэргүүлэхэд чухал үүрэгтэй ажилласан эрхмүүдийн нэг юм.
“Манчестер Сити”-гийн дасгалжуулагч Пеп Гуардиола энэ сард тоглогч худалдан авах зайлшгүй шаардлага бий гэдгийг онцолж, “Зарим байрлалд нэмэлт хүч үгүйлэгдэж байна. Багийнхан маань бүрэн бүрэлдэхүүнээрээ байхад бид бүтэн баг байлаа. Гэсэн хэдий ч гол тоглогчид маань долоо хоног, заримдаа бүр сарын хугацаанд талбайд тоглохгүй байна” гэсэн юм.
Уолкер, Де Брейне, Гүндоган нарын хувьд замналынхаа сүүлийн үеийг туулж байгаа тул бүрэлдэхүүнээ залуужуулах шаардлага ч бодитой байна.
Хэдийгээр Премьер лигт аваргын цомын төлөө өрсөлдөнө гэдэг холдсон ч, Аваргуудын лиг болон ФА цомыг өргөх боломж хэвээр байгаа тул “Сити”-д сэргэлт үнэхээр чухал байгаа юм.
