Саудын Арабын “Аль-Насср” клуб Нигерийн хөлбөмбөгчин Виктор Бонифасийг 60 сая еврогоор худалдаж авахаар тохиролцжээ.
Улмаар түүнд улирал тутам 15 сая еврогийн цалинг амласан байна.
Өдгөө Германы “Байер Леверкузен” клубт хүчин зүтгэж буй Бонифас эрүүл мэндийн үзлэгийг амжилттай давбал эл хэлэлцээр албан ёсоор баталгаажих юм.
Бонифас “Леверкузен” дэх анхны улиралдаа үнэхээр супер амжилтад хүрсэн. Тэрбээр өнгөрсөн улирлын Бундес лигт хожигдолгүй түрүүлснээс гадна Германы цом, дотоодын Супер цомын тэмцээнүүдэд аваргалсан юм.
Ингээд Бундес лигийн улирлын шинэ залуу тоглогчийн шагналыг гардсан. Өнгөрсөн улиралд тэрбээр 34 тоглолтод оролцохдоо 21 гоол оруулснаас гадна 10 гоолын дамжуулалтыг бүртгүүлээд байна.
“Аль-Насср” клуб өдгөө Про лигийн 4-р байрт бичигдэж байгаа юм. Тэдний бүрэлдэхүүнд Криштиано Роналду, Марсело Брозович, Садио Мане, Аймерик Лапорт нарын одод буй.
