National Basketball Association (NBA) буюу Үндэсний сагсанбөмбөгийн холбоо нь манай гарагийн сагсанбөмбөгийн хамгийн хүчирхэг, хамгийн шилдэг нь гэдэгтэй хэн ч маргахгүй биз.
Наян насыг бараг шүргэж буй (НБА нь 1946 онд байгуулагдсан) НБА-д олон арван жилийн турш Америкийн тоглогчид давамгайлж ирсэн түүхтэй. Харин дэлхий "хавтгай" болсон өнөө үед ертөнцийн дөрвөн зүг, найман зовхисоос хамгийн шилдэг сагсчид НБА-г зорих болж, гадны (Америкаас өөр улсад төрсөн) тоглогчдын тоо жилээс жилд өсч байна.
Энэ 2024-2025 оны улиралд гэхэд л 43 орны 125 тоглогч НБА-д байгаа нь рекорд амжилт юм.
НБА-д Канадын 21, Францын 14, Австралийн 13 сагсчин тоглож буй бол харин "Голден стэйт уорриорз" баг хамгийн олон гадаад тоглогчтой багт тооцогдож байна.
Одоогийн байдлаар "Алтан мужийн дайчид"-д Канад ( Э.Уиггинс, Ж.Роу) Конго ( Ж.Куминга), Бразил ( Ж.Сантос), Бахамын арлууд ( Б.Хилд), Холланд ( К.Пост), Герман ( Д.Шрөдер), БНХАУ (К.Андерсон) гээд долоон орны найман легионер байна.
Мөн НБА-ийн хамгийн үнэ цэнэтэй, шилдэг тоглогчийн шагналыг ( MVP) сүүлийн зургаан жил гадны (Америк бус) тоглогчид (Грекийн Я.Антетокунпо хоёр, Сербийн Н.Йокич гурав, Камеруны Жоэл Эмбийд нэг удаа) хүртээд байгаа билээ.
Нэг үгээр НБА Америкийн бус дэлхийн лиг хэдийнээ болжээ.
Ц.Энхтүвшин Таван цагариг сонин
