1 мин

Анхны трансжендэр тамирчин ОЛИМПЫН НААДАМД оролцох эрхээ авлаа

Г.Сүрэн 2021.06.22 1

Шинэ Зеландын тамирчин Лорел Хаббард “Токио-2020” Зуны олимпын XXXII наадамд оролцох эрхээ авснаар олимпт өрсөлдөх анхны трансжендэр* тамирчин боллоо. 

Түүний хангасан болзлын дагуу Олимпын хорооноос эмэгтэйчүүдийн 87 кг-ийн хүндийн өргөлтийн тэмцээнд оролцох эрхийг гардуулжээ. Тэр 2013 оноос өмнө буюу бэлгийн чиг баримжаагаа илэрхийлэхээсээ (coming out) өмнө эрэгтэйчүүдийн төрөлд хүндийн өргөлтийн тэмцээн уралдаанд оролцдог байжээ. Түүнийг эмэгтэйчүүдийн төрөлд олимпын эрхийн төлөө тэмцээнд ороход шүүмжлэгчдийн зүгээс хүчний хувьд шударга бус хэмээн багагүй маргаан дагуулж байв. 

Лорел даваа гарагт хийсэн мэдэгдэлдээ "Олон олон шинэ зеландчуудаас өгсөн урам, сэтгэлд талархаж байна" гэжээ. 

Олон Улсын Олимпын Хорооноос 2015 онд трансжендэр тамирчдад тавих шалгуурыг өөрчилж, хэрэв эмэгтэй төрөлд өрсөлдөх трансжендэр тамирчны тестостероны хэмжээ босго хэмжээнд нийцэхүйц байвал өрсөлдөхийг зөвшөөрөх дүрмийг баталжээ. Энэхүү шаардлагыг бүрэн хангаж, олимпын эрхийг авсан анхны тамирчин Лорел боллоо. Тестостерон нь эрэгтэй хүний булчингийн массыг бүрдүүлэгч даавар юм. 

Трансжендэр эмэгтэй нь төрөхөд тэмдэглэгдсэн хүйс нь эрэгтэй хэдий ч өөрийгөө мэдэрч, тодорхойлж, нийгэмшин амьдарч буй хүйс нь эмэгтэй хүнийг хэлнэ.

Эх сурвалж: BBC 

Г.Сүрэн 2021.06.22