2 мин

HBO дэлгэцэнд хэзээ ч гарахгүй “The Long Night” цувралд 30 сая доллар зарцуулжээ

Ub.life 2021.12.03 1 1

Алдарт “Хаан ширээний тоглоом” цуврал дууссаны дараа үзэгчид зохиолын үргэлжлэл эсвэл өмнөх үйл явдлыг харуулсан бүтээл гараасай хэмээн битүүхэн найдаж байсан билээ. HBO компани “Хаан ширээний тоглоом” цувралын өмнөх үеийн түүхийг өгүүлэх бүтээл дээр ажиллаж эхэлсэн тухай 2017 онд мэдэгдэж байв. 

“The Long Night” (киноны нэрийг албан ёсоор тогтоогүй байсан) цувралд Вестеросын нууцлаг түүх, Цагаан алхагчдын гарал үүслийн талаар өгүүлэх бөгөөд 2019 оны долоодугаар сард зураг авалтын эхний хэсгийг дуусгасан хэмээн мэдээлж байсан ч гуравхан сарын дараа цувралыг бүрмөсөн цуцалсан юм. Тухайн үед HBO компани “The Long Night”-ийг цуцлах болсон шалтгааныг нарийн тайлбарлаагүй ба оронд нь 10 ангит  "House of the Dragon" -ийг бүтээж байгаагаа дуулгасан. Тэгвэл сэтгүүлч Жеймс Эндрю Миллерийн саяхан хэвлэгдсэн "Tinderbox: HBO's Ruthless Pursuit of New Frontiers" номонд уг цуврал цуцлагдсантай холбоотой үзэгчдийн мэдээгүй зарим нэг мэдээлэл ил болжээ. 

Холбоотой мэдээлэл: HBO “The Long Night” цувралыг цуцалж, "House of the Dragon" -ийг бүтээхээр болсноо мэдэгдлээ

"WarnerMedia"- ийн тэргүүнээр ажиллаж байсан Боб Гринблатт "Намайг очиход цувралын туршилтын зураг авалтад хэдийн 30 сая долларыг зарцуулаад байсан. Хэдэн сарын дараа би авсан дүрснүүдээс үзээд л Кейсид (HBO-ийн контент хариуцсан захирал) "Энэ бүтэхгүй нь, амласан хүлээлтэд хүрэхгүй юм байна" гэж хэлсэн. Тэр ч миний саналыг үгүйсгээгүй" хэмээн  сэтгүүлч Миллертэй хийсэн ярилцлагадаа дурджээ. 

Хэдийгээр “Хаан ширээний тоглоом”-оос сэдэвлэсэн эхний цуврал бүтэлгүйтсэн ч "House of the Dragon" цувралын хөгжүүлэлт амжилттай болж 2022 онд нээлтээ хийхээр болоод байгаа билээ. 

Холбоотой мэдээлэл: 'House of the Dragon' цувралд хэн ямар дүр бүтээх вэ?

Эх сурвалж: Insider

Ub.life 2021.12.03