300 жилийн түүхтэй "нууц" номын санд 9 доллар төлөөд хонох ховор боломж
Лондоны түүхэн дурсгалт Гэгээн Паулын сүм дөрөвдүгээр сарын 23-нд болох Дэлхийн номын өдрийг тохиолдуулан номонд шимтэгсдэд онцгой бэлэг барьж байна.
Тэд гуравдугаар сарын 15-нд хоёр зочныг хүлээн авч, нууц номын сандаа хонуулахаар болжээ. Зочид ердөө 7 фунт стерлинг (9 орчим доллар) төлөөд тус түүхэн дурсгалт номын санд бүтэн шөнийг өнгөрөөх аж. Гэгээн Паулын сүм нь дундад зууны үеийн гар бичмэлүүд, анхны хэвлэмэл номын ховор цуглуулгаас эхлээд саяхан хэвлэгдсэн шинэ бүтээл хүртэл нийт 22,000 гаруй номтой юм. Мөн энэ нь Дэлхийн II дайнаас хойш анх удаа Гэгээн Паулын сүмд хүн хонуулахаар болсон тохиолдол гэдгээрээ онцлог юм.
Гэгээн Паулын сүмийн бас нэгэн гайхамшиг нь 300 гаруй жилийн өмнө Английн архитектор Кристофер Врений зохион бүтээсэн эргүүлэгт шат билээ. Тэгвэл ховор завшааныг эдлэх хоёр зочныг Дикан хүлээн авч түүхэн сүмтэй танилцуулах бөгөөд аяллын төгсгөлд эргүүлэгт шатаар авирч, нууц номын санд хүрэх юм.
Мөн зочдыг өглөөний цай, оройн хоолоор дайлж эцэст нь Холли Жексоны "Рэйчел Прайс дахин гарч ирсэн нь", Жон Гришамын "Камино хий үзэгдэл" зэрэг хараахан хэвлэгдээгүй байгаа номуудыг зохиогчийн гарын үсэгтэй нь гардаж авна гэж сүмийн зүгээс мэдээлжээ.
Гайхамшигт боломжийг эдлэхийг хүссэн хүмүүс гуравдугаар сарын 12-ноос эхлэн Airbnb-ээр захиалгаа өгч болох аж.
Эх сурвалж: BBC, The Guardian