Инстаграмын чат доторх нууц тоглоомыг тоглож үзсэн үү?
Мета компани саяхан инстаграмын DM буюу шууд мессеж илгээх хэсэгт чухал өөрчлөлтүүд хийснээ зарласан билээ. Тэгвэл инстаграмд нэмэгдсэн шинэчлэлүүд үүгээр дууссангүй.
Инстаграмын чат дотор нууц эможи тоглоом шинээр нэвтэрсэн байна. Тоглоомын дүрэм тун энгийн. Эможигоо доош унагахгүйгээр тасралтгүй эргүүлдүүлэхийн тулд дэлгэцийн доод хэсэгт байрлах сэлүүрийг хөдөлгөх юм.
Тоглоомыг тоглохын тулд инстаграмын чат руугаа орж хэн нэгэн рүү дуртай эможигоо илгээгээд дараа нь эможи дээрээ дарахад дэлгэц шар өнгөтэй болж, тоглоом автоматаар эхэлнэ. Үе ахих тусам дэлгэцийн өнгө бараан болох аж.
Тоглоомыг эхлүүлэхийн тулд ямар ч эможиг ашиглаж болох бөгөөд гол нь нэг л эможи илгээх шаардлагатай юм байна. Эможи илгээсэн хүн таныг тоглоом тоглож буйг мэдэхгүй. Мөн таны авсан хамгийн өндөр оноо хадгалагдаж үлдэх тул дараагийн удаа тоглохдоо рекордоо эвдэх боломжтой гэсэн үг юм.
Одоогийн байдлаар бүх хэрэглэгч чат доторх нууц тоглоомыг тоглох боломжгүй байгаа бөгөөд удахгүй бүх хэрэглэгчдэд идэвхэжнэ гэжээ.
Холбоотой мэдээлэл: Инстаграмын мессежээ засах, уншсан эсэхээ нуух боломжтой боллоо
Эх сурвалж: Tech Crunch