Хэдхэн цагийн дараа Парис-2024 олимпын наадмын нээлтийн ёслол болно. Алдарт Леброн Жеймс АНУ-ын багийн тугчаар томилогдоод сэтгэл догдлон сууж байна. Хэдийгээр агуу тамирчны намтарт жижиг зүйл мэт санагдаж болох ч Төрийн далбаагаа бариад алхаж байгаа түүний зургийг ирээдүйд хийх Леброны намтар кинонд ашиглах юм.
Парист түүнээс гадна Яннис Адетокунбо (Грек), Деннис Шрёдер (Герман) нар эх орныхоо далбааг өргөх болно. Ингээд олимпын наадамд тугчаар ажиллаж байсан НБА-гийн оддыг эргэн нэг санацгаая.
Эндрю Гейз (Австрали) - 2000
Төрөлх эх орондоо болсон олимпод тугч болно гэдэг хүндтэй үүрэг. Гейз бол НБА-д хоёр улирал тоглосон, Австралийн сагсан бөмбөгийн домог. 1999 онд Тим Данкан, Дэвид Робинсон хоёртой хамт Сан-Антонио Спёрс багт лигийн аварга болж байлаа.
Яо Мин (Хятад) - 2004
Тэр үед Хятадын хамгийн агуу тамирчин нь Яо Мин байлаа. Олимпын наадамд тэдний баг наймдугаар байрт оржээ.
Карлос Арройо (Пуэрто-Рико) - 2004
Карлос Арройо НБА-д 569 тоглолтод оролцсон. Афинд Пуэрто-Рико америкчуудыг хожсон билээ.
Дирк Новицки (Герман) - 2008
Новицки НБА-д MVP болоод, оргил үедээ Бээжинд очсон. Харамсалтай нь аравдугаар байрт дууссан.
Яо Мин (Хятад) - 2008
Тиймээ, Яо Мин хоёр удаа тугч болсон. Нутагтаа болсон олимпод тэр дахиад л наймдугаар байрын шагналтай.
Андрей Кириленко (ОХУ) - 2008
Андрей Европын аварга болчихоод Бээжинд очиж байлаа. Хэсэгтээ тавдугаар байр гэдэг хүссэн амжилт нь биш байлаа.
Шарунас Ясикявичюс (Литва) - 2008
Ясикявичюс шинэ Литвагийн лидер байв. НБА-д хэдэн улирал тоглохдоо Голден Стэйт Уорриорзт байв.
Ману Жинобили (Аргентин) - 2008
Агуу Жинобили хүрэл медальтай нутаг буцсан.
И Цзяньлянь (Хятад) - 2012
2011 онд Яо Мин зодог тайлж, И Цзяньлянь орлосон. Тэр НБА-д тун дажгүй таван улирал тоглосон.
Пау Газоль (Испани) - 2012
Европын шилдгүүдийн нэг Газоль олимпод түрүүлж чадаагүй. Лондонд тэд мөнгөн медаль хүртсэн.
Луис Скола (Аргентин) - 2016
Аргентин плей-оффт шалгарсан ч АНУ-д ялагдсан.
Томаш Саторански (Чех) - 2020
Анх удаагаа олимпод шалгарсан багийн лидер нь тэр байв.
Патрик Миллз (Австрали) - 2020
Миллз НБА-д дажгүй тоглосон. Харин шигшээдээ бүр супер тоглож, хүрэл медаль авсан билээ.
