ДАШТ-ий хүрэл, Азийн наадам болон Азийн АШТ-ий алтан медальт, гавьяат тамирчин Э.Цэндбаатар аравдугаар сарын 16-нд буюу 28 насныхаа төрсөн өдөртэй таширлан мэргэжлийн боксын рингэнээ 11 дэх тулаанаа хийхээр зэхэж байна. Түүний тулаан товлогдсон өдрөөсөө 7 хоногоор хойшилсон нь энэ.
Тэрбээр эхний 10 тулаандаа дараалан ялсныхаа тавд нь хүнд цохилтоор өрсөлдөгчөө буулгаж аваад байгаа юм.
Харин ирэх долоо хоногт түүнтэй гар зөрүүлэх Доминиканы боксчин Френси Фортунатогийн хувьд, өдгөө 26 настай агаад зургаан жилийн хугацаанд мэргэжлийн рингэнээ 16 тулаанд оролцохдоо 15-д нь ялалт байгуулж, ганцхан ялагдал хүлээсэн.
Тэгэхдээ 11 өрсөлдөгчөө хүнд цохилтоор буулгаж авсан нь шаггүй хүнд гартай нэгэн гэдгийг нь илчилж байна. Эл тулаан АНУ-ын Флорида мужийн “Probox Events” төвд болно.