Албанийн Тирана хотноо аравдугаар сарын 21-27-ны өдрүүдээр 23 хүртэлх насныхны сонгомол, чөлөөт бөхийн ДАШТ явагдаж байна.
Өнөөдөр дэвжээнд эмэгтэйчүүдийн 50, 55, 59, 68, 76 кг-ын жингийн бөхчүүд барилдав.
50 кг-ын жинд зодоглосон өсвөр, залуучуудын ДАШТ-ий хүрэл медальт М.Мөнхгэрэл, эхний тойрогтоо Литвийн Вестинаг 6:2-оор давсан ч, шөвгийн 16-д Украйны Наталья Кливчуцкад 5:3 харьцаатай ялагдлаа. Кливчуцка шөвгийн наймд Наталья Пудовад унаснаар М.Мөнхгэрэлийн хувьд тэмцээнээ өндөрлүүллээ.
55 кг-ын жинд хүч сорьсон 23 хүртэлх насныхны Азийн хошой аварга Б.Отгонтуяа Казахстаны Айнур Ашимоваг 8:2-оор ялж, шигшээ 16-д Парисын олимпод хүч сорьсон залуучуудын ангиллаарх дэлхийн аварга, Европын АШТ-ий хошой алттай Шведийн Малмгренд уналаа.
Малмгрен нэвтхэн барилдсаар финалд шалгарсан тул Б.Отгонтуяа Украины Олександра Хоменецтэй дагах барилдаанд зодоглоно.
59 кг-д барилдсан Б.Хулан эхний тойрогтоо Киргизийн Сезим Жуманазаровад цэвэр ялагдлаа.
68 кг-д зодоглосон 23 хүртэлх насныхны Азийн аварга Т.Энхжин Киргизийн Нурзат Нуртаеваг 5:4-өөр давсан ч, шигшээ наймд Хятадын Ду Синзед 3:2-оор унав. Хятадын бөх финалдаж чадаагүй тул Т.Энхжин дагаж барилдах боломжгүй болсон.