Өнгөрсөн амралтын өдрүүдээр Монголын Премьер лигийн намрын улирлын хаалтын тоглолтууд явагдаж, урин цаг иртэл түр завсарлаад байгаа билээ.
Харин 10-р сарын 27-ноос 11-р сарын 2-ний өдрүүдээр Монголын хөлбөмбөгийн холбооны талбайд Азийн “Челленж лиг”-ийн “E” хэсгийн тоглолтууд болно.
Монголын Премьер лигийн өнгөрсөн улирлын үнэмлэхүй аварга “СП Фалконс” клуб 10-р сарын 27-нд Индонезийн “Мадура Юнайтед” багтай тоглох бол 10-р сарын 30-нд Камбожийн “Преа Хан Рич”-ийн эсрэг хүч сорих юм.
Улмаар хэсгээ тэргүүлсэн эхний хоёр баг нь “Челленж лиг”-ийн хасагдах шатнаа өрсөлдөх учиртай.
“Челленж лиг” нь Азийн клубүүдийн түвшний гуравдугаарт эрэмблэгдэх томоохон тэмцээн бөгөөд өнөө жилээс шинэчлэгдсэн форматаар зохион байгуулагдаж байгаа гэдгээрээ онцлог.
