Парисын олимпын эмэгтэй боксын 66 кг-ын аварга, Алжирын боксчин Иман Халифыг тойрсон шуугиан мартагдаагүй хэвээр байгаа. Түүнийг трансжендер, эрэгтэй хэмээн олон янзаар сэжиглэсэн ч Иман огт тоохгүй тулалдсаар аваргын алтан медаль авч чадсан юм. Нэгэнт олимпын аварга болсон тул түүнд сонирхогчдын бокст хийх зүйл үлдсэнгүй.
Иман саяхан хэвлэлийн бага хурал хийлгэж, цаашдын зорилгоо ярилаа. Тэрээр “Мэргэжлийн боксоос маш их урилга ирсэн тул мэргэжилд орохоор шийдлээ. Одоохондоо ямар холбоо гэдгээ шийдээгүй байна. Алжирчууд бид мэргэжилд төлөөлөлтэй байхыг хүсэж байна. Миний амжилтад хүрсэн түүхийн талаарх баримтат кино удахгүй олны хүртээл болно. Би өөрийн түүхийг залуу эмэгтэйчүүдтэй хуваалцахыг хүсэж байна” гэж ярилаа.
