Мэргэжлийн сүмо бөхөд монгол бөхчүүдийг анх урьж, замыг нь зааж өгсөн Ошима ояката буюу озэки Асахикүни энэ сарын 22-нд нас барлаа. Сүүлийн жилүүдэд биеийн байдал тааруу байсан бөгөөд 77 настай байлаа.
Хоккайдогийн уугуул Оота (Ошима оякатагийн жинхэнэ нэр) хөвгүүн дунд сургуулиа дүүргээд 1963 онд Тацүнами дэвжээнд элсэж байлаа. 174 см өндөр жижигхэн биетэй ч озэки цол хүртэж чадсан агуу бөх байлаа. Нэг барьц авахаараа салж өгдөггүй, зуураад байдаг тул бөх сонирхогчид түүнийг “Пиранья” махчин загастай зүйрлэдэг байлаа. Мөн барилдааны талаар маш их судалгаа хийдгийг нь үнэлэн, “Сүмо доктор” гэж нэрлэдэг байв.
1979 онд зодог тайлаад Ошима ояката болж, 1980 онд тусдаа гарсан. 1992 онд Кёкүшюүзан тэргүүтэй зургаан монгол залууг авчирч, сүмо бөхөд анх монголчуудыг оруулж ирсэн гавьяатай. Үүнээс Кёкүшюүзан, Кёкүтэнхо хоёр санякүд хүрсэн нь дараа нь монгол 5 ёкозүна төрөх үүд хаалга болж өгсөн юм.
