Мэргэжлийн сүмо бөхөд монгол бөхчүүдийг замыг нь зааж өгсөн Ошима ояката буюу озэки Асахикүни энэ сарын 22-нд өвчний улмаас 77 насандаа таалал төгслөө. Өнөөдөр түүний Токио дахь гэрт нь Сүмо бөхийн холбооны удирдлага, бөхчүүд очиж, эмгэнэл илэрхийллээ.
Ошима ояката 1991 оны өвөл 12 дугаар сард Монголд өөрийн биеэр ирж,160 хүүхдийг үндэсний бөхөөр барилдуулж, 6 хүүхдийг сонгон авч байсан нь монголчуудын сүмо бөхийг эзэгнэх яруу замналын эхлэл байв. Тэр зургаан хүүхдийн нэг Н.Цэвэгням одоо Ошима дэвжээг өвлөн авч, үргэлжлүүлэн удирдаж байгаа билээ.
Багшийнхаа гэрт ирсэн Кёкүтэнхо буюу одоогийн Ошима багшийг сэтгүүлч нар бүчин авлаа. Н.Цэвэгням “Манай багш байгаагүй бол Асашёорюү, Хакүхо тэргүүтэй монгол ёкозүна нар төрөөгүй байж ч мэдэх юм. Маш хатуу ояката байсан ч хайр нь дотроо хүн байлаа. Нэг удаа зугтаад Монголдоо хариад байж байтал Монголд ирээд “Чи хүчтэй сүмоч болж чадна” гэж итгэл олгосоор буцаан авч байлаа” гэж дурсан ярьсан байна.
