“Ливерпүүл” клубийн хамгаалагч Костас Цимикас багийнхаа өнгөрсөн улирлын нөхцөл байдлын талаар болоод Арне Слотын тухайд байр сууриа илэрхийллээ.
“Ливерпүүл” клуб лхагва гарагт Аваргуудын лигийн тэмцээнд “Лейпцик”-ийг Дарвин Нунезийн гоолоор 1:0 харьцаатай хожсон билээ. Улмаар шинэ дасгалжуулагчийн удирдлагад улирлын эхний 12 тоглолтодоо 11 хожсон нь тус клубийн түүхэн дээд амжилт болж дархлагдав.
Харин ням гарагт “Арсенал”-ыг хожиж чадвал талбайн эздээс долоон онооны зөрүүтэй болж, Премьер лигийн тэргүүллээ хадгалж үлдэх учиртай.
Цимикас хэлэхдээ “Арсенал”-тай хийх тоглолтын талаар ярихад одоохондоо эрт байна. Гэлээ ч бидний баримталж буй нэн тэргүүний зорилго маань бүх тоглолтодоо ялах явдал. Тиймээс “Арсенал”-ын талбай руу хөлбөмбөг тоглож, хожихын төлөө явна. Өнгөрсөн улирлын ФА тэмцээний тоглолтод “Манчестер Юнайтед”-д хожигдсоноос хойш бидний бүх амжилт сүйрэхэд хүрсэн. Түүнээс хойших тоглолтуудад бид урьдынх шигээ баг биш болсон гэж санагддаг. Иймд энэ улирлын тоглолт бүрийг финал хэмээн санаж, бүгдэд нь ялахыг хичээх болно. Бид хожихыг, дасгалжуулагчийн хүссэн зүйлсийг гүйцэлдүүлэхийг хичээдэг. Бид бүгд хамтдаа хамгаалж тоглодог. Шинэ дасгалжуулагчийн маань биднээс хүсдэг зүйлсийн нэг нь багаараа хамтдаа хамгаалж тоглох явдал юм. Хүн бүр хамгаалж, бүгд довтолж, аль болох олон гоол оруулахыг хүсдэг. Бид амжилтаар өлсөж байна. Слотын ажиллаж буй арга барил надад таалагддаг” гэв.