Албанийн Тирана хотноо аравдугаар сарын 21-27-ны өдрүүдээр 23 хүртэлх насныхны сонгомол, чөлөөт бөхийн ДАШТ явагдаж байна.
Өнөөдөр дэвжээнд эмэгтэйчүүдийн 53, 57, 62, 65, 72 кг-ын жингийн бөхчүүд барилдав.
53 кг-ын жинд зодоглосон Азийн АШТ-ий мөнгө, хүрэл медальт Ч.Отгонтуяа, Энэтхэгийн Хансика Ламбаг цэвэр ялж, Америкийн Ивалдиг 10:8-аар буулгаж авснаар хагас шигшээд шалгарсан. Гэвч мөнгөн медалийн төлөөх барилдаанд өсвөрийн Азийн АШТ-ий үзүүр бөх, 20 хүртэлх насныхны Азийн аварга Японы Юу Сакамотод уналаа.
Улмаар Чинболдын Отгонтуяа үдээс хойш хүрэл медалийн төлөө барилдана.
62 кг-д хүч сорьсон 23 хүртэлх насныхны Азийн аварга, Токиогийн олимпын 5-р байрын шагналт Б.Хонгорзул тэгшитгэх барилдаанд Францын Айрис Матильдыг цэвэр ялсан ч, Хятадын Жан Ханнингт унаснаар тэмцээнээ өндөрлүүллээ.
65 кг-д барилдсан 23 хүртэлх насныхны Азийн АШТ-ий хүрэл медальт Б.Ганцэцэг эхний тойрогтоо гоц мөргөж, өсвөрийн болон 20 хүртэлх насныхны ДАШТ-ээс хүрэл медальтай Оросын Ксения Циаренияд унав. Оросын бөх шөвгийн наймд ялагдсан тул Б.Ганцэцэг дагаж барилдах боломжгүй болсон юм.
72 кг-д зодоглосон 23 хүртэлх насныхны Азийн АШТ-ий хошой хүрэл медальтай Д.Цогзолмаа эхний барилдаандаа 23 хүртэлх насныхны ДАШТ болон Европын аваргын хүрэл медальт Оросын Викториа Радзковад 4:0-ээр ялагдлаа. Оросын бөх хагас шигшээд унасан тул Д.Цогзолмаа тэмцээнээ өндөрлүүлэв.
