Сагсан бөмбөгийн Үндэсний дээд лигийн 2024-25 оны улирал аравдугаар сарын 12-ны өдөр хөшгөө нээсэн билээ. Дээд лигийн тэмцээн сүүлийн жилүүдэд нэгдсэн байдлаар зохион байгуулагдаагүй байсан таагүй цаг үед цэг тавьсан нь 2021 оны үйл явдал юм. Тэгвэл энэ улирлаас лигийн бүх багууд 3 жилийн хамтын ажиллагааны гэрээг үзэглэж, тогтвортой хөгжлийн томоохон шатыг бэхэллээ. Бид та бүхэнд Үндэсний Дээд лигийн тухай мэдвэл зохих ЗУРГААН чухал зүйлийг онцлон хүргэж байна.
Тэгш ойн жил
Энэ улирлын Үндэсний Дээд лигийн эмэгтэйчүүдийн төрөлд зургаан баг, эрэгтэйчүүдийн төрөлд арван баг оролцож буй. Нийтдээ гурван тойрог өрсөлдөх улирлын тоглолтуудын дүнгээр багуудыг эрэмбэлж, плей-оффын өрсөлдөөнд шалгаруулна.
Сонирхолтой нь, өнөө жил Үндэсний дээд лигийн тэмцээний 30 жилийн тэгш ой тохиож байна.
Дотоодын тоглогчдын үнэлгээ өсөв
Дээд лигийн энэ улирлын шилжилт, хөдөлгөөний томоохон дуулианы эзнээр А.Базаргүр тодорсон. Тэрбээр “Эйпс” багаас “Сэлэнгэ Бодонс” руу 120 сая төгрөгөөр буурь сэлгэсэн юм. Түүнчлэн “Сэлэнгэ Бодонс” багийн зүгээс түүнтэй 450 сая төгрөгийн цалин бүхий гурван жилийн шинэчилсэн гэрээг үзэглэснээ зарлаад байна.
Харин энэ зуурт Монголын эмэгтэй сагсан бөмбөгчдийн түүхэн дэх хамгийн өндөр дүнтэй гэрээг “Арав”-т баг Баттогтохын Өнөрзаяатай үзэглэсэн нь 40 сая төгрөгийнх гэсэн шуум сонсогдоод амжив.
Легионеруудын ирэх цаг нь наашилжээ
Энэ улирлаас тоглолтын 2 болон 3-р үед хоёр легионер тоглогчийг зэрэг талбайд гаргах боломж нээгдсэн. Улмаар өмнөх жилүүдэд плей-оффын шат дөхөхтэй зэрэгцээд легионер тоглогчдын эрэлд гардаг байсан бол харин өдгөө энэ байдал эрс өөрчлөгдөж улирлын тоглолтуудад ч гэсэн багууд томоохон ач холбогдол өгөх болжээ. Мэдээж энэ үзэгдэл үзэгчдэд таатай байх нь гарцаагүй. Учир нь өрсөлдөөн чангарах тусам хөгжөөн дэмжигчдэд бахдалтай сайхан байхаас өөр яах билээ.
Улирлын үнэ цэнтэй тоглогчийн төлөөх хүчтэй өрсөлдөөн
Зөвхөн баг хоорондын өрсөлдөөнөөс гадна тоглогчдийн хувийн үзүүлэлт хэрхэн өөрчлөгдөж буйг анзаарч байдаг үзэгч цөөнгүй. Тэгвэл өнөө жил “SG Apes” багийн ахлагч М.Өлзий-Орших, “Бишрэлт Металл”-ын Т.Ууганбаяр, “Хасын Хүлэгүүд”-ийн ирээдүй гэгдэж буй А.Азбаяр тэргүүтэй олон тоглогчийн өсөлт, хөгжлийг гэрчлэх бүтэн улирал биднийг хүлээж байна.
“Хасын Хүлэгүүд”-ийн хожигдолгүй цуврал хэзээ зогсох вэ?
Одоогоор баг тус бүр дөрөв тоглоод байна. “Хүлэгүүд” бүх тоглолтодоо ялалт байгуулсан бол эсрэгээрээ “Эрдэнэт Майнерс” баг ганц ч хожиж чадаагүй байна. Тэд “Бишрэлт Металл” багаас залуу тоглогч Г.Болор-Эрдэнэг буурь сэлгэхээр зэхэж байгаа ч өдийг хүртэл тохиролцоонд хүрээгүй л байна.
Хүлээлт
Үндэсний дээд лиг эхлээд багагүй хугацаа өнгөрсөн ч гэлээ шинэ улирлын зарим хүлээлт битүү хэвээр байна. Тухайлбал, “Налайх Бизон” багийн гол тоглогч Т.Санчир хэзээнээс тоглолтуудад оролцох бол? 3х3 болон нас насны Үндэсний шигшээ багуудын гол тоглогчид ачааллаа тэгш хуваарилж, багтаа чухал нөлөөтэй байж чадах болов уу? Энэ улиралд аль багийн хэн гэдэг тоглогч олны анхаарлын төвд байж, том тоглолтын хувь заяаг ямар тоглогчийн үйлдэл өөрчлөх бол?
Энэ бүхний хариултыг та Үндэсний дээд лигийн 2024-25 оны улирлын тоглолтуудаас хүлээн аваарай.
