Казахстаны шилдэг тулаанч, UFC холбооны ялагдалгүй тамирчин, Нүүдэлчин хочит Шавкат Рахмонов (18-0-0) ирэх 12 дугаар сарын 8-нд Лас Вегаст болох UFC 310 тэмцээнд ямар ч гэсэн оролцох болжээ. Энэ тэмцээнд Шавкат хагас дунд жингийн аварга, АНУ-ын палестин тулаанч Белал Мухаммадтай аваргын бүсийн төлөө өрсөлдөх байсан ч Белал эрүүл мэндийн шалтгаанаар оролцохгүй болсон. Ингээд казах баатарт өрсөлдөгч хайж эхэлсэн юм. Шавкат хамгийн сүүлд 2023 оны 12 дугаар сарын 16-нд UFC 296 тэмцээнд оролцсон тул энэ удаад тулалдахгүй бол хэт удаан завсарлах гээд байдаг. Колби Ковингтон тэргүүтэй хэд хэдэн тамирчин мэдэгдэл хийсэн ч яг тодорхой зүйл үгүй байв. Ингээд холбооноос АНУ-ын нигери гаралтай Камару Усманыг (20-4-0) түүнтэй тулалдуулах болсон талаар эх сурвалж мэдээлжээ.
Одоогийн байдлаар энэ жингийн чансааны нэгт Леон Эдвардс, хоёрт Камару Усман, гуравт Рахмонов бичигдэж байгаа. Аварга нь Белал Мухмаммад. Тэгэхээр Шавкот – Усман тулаан ямар статустай болох нь сонирхол татаж байна. Аваргын бүс юм уу, эсвэл зүгээр л нэг чансааны байр солих өрсөлдөөн үү?
Зарим шинжээчид Шавкот, Усман хоёрыг Флоридад хамт бэлтгэл хийдэг тамирчид тул хооронд нь тулалдуулахад утгагүй гэж мэдэгдсэн. Харин “Нигерийн аймшиг” хочит Усман “Нэг зүйлийг тодорхой болгох хэрэгтэй байна. Шавкат бид хоёр нэг багийн гишүүд биш. Тэр миний зааланд ирж, бэлтгэл хийдэг. Яг минийх биш л дээ, би тэнд сүүлийн 6 жил бэлтгэлээ хангаж байгаа. Үнэндээ “Kill Cliff” заал бол Генри Хуфтын заал” гэж бичсэн байна.
