Баасан гарагт Бөхийн өргөөнөө явагдсан Монгол улсад нисэх хүчин үүсэж хөгжсөний 100 жилийн ойд зориулсан, Дархан аварга цолны хүндэтгэлийн наадамд чансаа өндөр 128 бөх зодоглов.
Энэ наадамд Баянхонгор аймгийн Жинст сумын харьяат улсын начин Энхтүвшиний Батмагнай долоо давж түрүүллээ. Тэрбээр заалны барилдаанд дөрөв дэхиэ цойлсон нь энэ.
Э.Батмагнай Үндэсний их баяр наадмаас хойш Бөхийн өргөөнөө гурав түрүүлж, дөрөв үзүүрлэсэн төдийгүй тав шөвгөрлөө.
Өнөөдрийн барилдаанд Говьсүмбэр аймгийн хурц арслан Энхтөрийн Мөнхбаатар үзүүрлэв. Тэрбээр өнгөрсөн амралтын өдөр аймаг, цэргийн цолтнуудын барилдаанд түрүүлсэн бол залгаад улс, аймагт үзүүрлэлээ.
Их шөвөгт улсын арслан Б.Орхонбаяр, улсын үнэн зоригт харцага Б.Зоригтбаатар нар шалгарсан.
