Рианна Interview сэтгүүлийн нүүрэнд гэлэнмаагийн дүрээр морилж, ярилцлага өглөө. Түүний гэрэл зургийг Надя Ли Коэн авсан бөгөөд дуучин бүсгүй Dior, Bottega Veneta, Loewe, Loro Piana, Savage x Fenty брэндийг сонгожээ.
Хэдийгээр олон сая хүний хувьд стиль, загварын бэлгэ тэмдэг ч тэрээр ёслол, арга хэмжээнд орохдоо өмсөх хувцсаа эртнээс бэлтгээд бодоод байдаггүй гэнэ. Юуны өмнө тав тухтай хувцас байх ёстой гэдгийг хэлээд “Би маш залхуу ээж. Хүүхдүүдээ хувцаслах гэж их цаг зардаг. Дараа нь тэдний хувцсанд тохирсон гангараа сонгох гээд бодоод зогсчихдог” гэж ярьжээ.
Харин A$AP Rocky гадаад байдалдаа их анхаарал тавьдаг. Онгоцонд суухдаа ч Bottega Veneta костюм хослол өмсөөд ирдэг гэнэ. Тэд 2012 оноос найзууд болсон ч 2019 оноос л үерхэж эхэлжээ.
Цар тахлын үе тэдэнд дотно болох, нэг нэгнээ илүү сайн таньж, мэдэх бололцоо олгосон гэнэ. Энэ үед Рианна түүнийг сайн аав болно гэдэгт итгэлтэй болжээ.
2022 оны тавдугаар сард хүүтэй болж, RZA Athelston Mayers (Риза) гэж нэрлэсэн бол ирэх жил нь төрсөн хүүхэддээ Риот Роуз гэдэг нэр өгсөн.
Рианна “Бурхан юу хүсэж байгааг мэдэхгүй ч би ямар ч гэсэн хоёроос олон хүүхэдтэй болохыг хүсдэг. Охинтой болмоор байна. Гэхдээ мэдээж дахиад хүү байвал дахиад л хүүтэй болно” гэж ярьсан байна.
